សំណួរ-ចម្លើយ ក្រមរដ្ឋប្បវេណី និងក្រមនីតិវិធីរដ្ឋប្បវេណី (ភាគ៥)

សំណួរ

២១- តើការបោះបង់ផលប្រយោជន៍នៃការកំណត់ពេលមានប៉ុន្មានករណី ? អ្វីខ្លះ ?

២២- តើកូនបំណុលត្រូវបាត់បង់ផលប្រយោជន៍នៃការកំណត់ពេលមានករណីអ្វីខ្លះ ?

២៣- តើអ្វីទៅជារបៀបកំណត់អំឡុងពេល ?

២៤- តើហ៊ីប៉ូតែកគឺជាអ្វី ?

២៥- ដើម្បីឲ្យកិច្ចសន្យាមានសុពលភាព និងមិនអាចលុបចោលបាន តើត្រូវមានលក្ខខណ្ឌអ្វីខ្លះ ?

ចម្លើយ

២១- ការបោះបង់ផលប្រយោជន៍នៃការកំណត់ពេលមាន៣ករណីគឺ ៖

• ការបោះបង់ផលប្រយោជន៍នៃការកំណត់ពេលបំពានធ្ងន់ធ្ងរដល់ភាគីម្ខាងទៀត ។ ក្នុងករណីនេះភាគីមិនអាចបោះបង់ផលប្រយោជន៍នៃការកំណត់ពេលបានទេ ។
• ការបោះបង់ផលប្រយោជន៍នៃការកំណត់ពេលមិនបំពានធ្ងន់ធ្ងរដល់ភាគីម្ខាងទៀតទេ ប៉ុន្តែធ្វើឲ្យមានការខូចខាតដល់ភាគីម្ខាងទៀត ។ ក្នុងករណីនេះ ភាគីអាចបោះបង់ផលប្រយោជន៍នៃការកំណត់ពេលបាន ប៉ុន្តែត្រូវសងសំណងការខូតខាត ។
• ការបោះបង់ផលប្រយោជន៍នៃការកំណត់ពេល មិនបំពានធ្ងន់ធ្ងរដល់ភាគីម្ខាងទៀត​ ហើយក៏មិនធ្វើឲ្យមានការខូចខាតចំពោះភាគីម្ខាងទៀតដែរ ។ ក្នុងករណីនេះ ភាគីអាចបោះបង់ផលប្រយោជន៍នៃការកំណត់ពេល ហើយមិនចាំបាច់សងសំណងការខូចខាតទេ ។

២២- កូនបំណុលត្រូវបាត់បង់ផលប្រយោជន៍នៃការកំណត់ពេលមានករណីដូចជា ៖

• កូនបំណុលត្រូវបានប្រកាសក្ស័យធន
• កូលបំណុលបានធ្វើឲ្យខូចខាតប្រាតិភោគ
• កូនបំណុលករណីយកិច្ចត្រូវដាក់ប្រាតិភោគ ប៉ុន្តែមិនបានបំពេញករណីយកិច្ចនេះ
• មានហេតុដែលគូភាគីបានព្រមព្រៀងគ្នា បានកើតឡើង ។

២៣- ជាទូទៅ ការកំណត់អំឡុងពេល អាចកំណត់បានអាស្រ័យទៅគូភាគីនៃកិច្ចសន្យា​ ដែលសន្មត ឬព្រមព្រៀងគ្នា ក្នុងការកំណត់អំឡុងពេល ដើម្បីឲ្យមានអានុភាពគតិយុត្តបានកើតឡើង ឬបានផុតរលត់ ។

២៤- ហ៊ីប៉ូតែក គឺជាសិទ្ធិប្រាតិភោគមួយប្រភេទ ដែលម្ចាស់បំណុលមានសិទ្ធិទទួលបានការសងចំពោះសិទ្ធិលើបំណុលរបស់ខ្លួនដោយមានអាទិភាពជាងម្ចាស់បំណុលផ្សេងទៀត ចំពោះអចលនវត្ថុដែលបានដាក់ជាប្រាតិភោគនៃកាតព្វកិច្ច ដោយកូនបំណុល ឬដោយគតិយជន មិនផ្ទេរការកាន់កាប់ (មាត្រា៨៤៣ កថាខណ្ឌទី១ នៃក្រមរដ្ឋប្បវេណី) ។ ផ្អែកតាមអត្ថន័យនេះ ហ៊ីប៉ូតែក គឺជាប្រភេទនៃសិទ្ធិប្រាតិភោគមួយដែលមិនផ្ទេរការកាន់កាប់ ពោលគឺ ហ៊ីប៉ូតែកគ្រប់គ្រងចំពោះតែតម្លៃនៃវត្ថុតែប៉ុណ្ណោះ ហេតុនេះកូនបំណុល ឬគតិយជនដែលបានយកវត្ថុមកដាក់ជាប្រាតិភោគ នៅតែមានសិទ្ធិប្រើប្រាស់ និងអាស្រ័យផលពីវត្ថុនោះដដែល ។ ម្យ៉ាងវិញទៀត ហ៊ីប៉ូតែកក្រៅពីមិនតម្រូវឲ្យផ្ទេរ ការកាន់កាប់ ក៏មិនតម្រូវឲ្យប្រគល់ប័ណ្ណកម្មសិទ្ធិដែរ នេះគឺជាចំណុចខុសគ្នាអំពីការដាក់ធានា ដែលមានចែងនៅក្នុងច្បាប់ភូមិបាល ។ មួយវិញទៀត ហ៊ីប៉ូតែកអាចធ្វើបានច្រើនដង មានន័យថាគេអាចបង្កើត ហ៊ីប៉ូតែកច្រើនជាងមួយ ហើយក្នុងករណីហ៊ីប៉ូតែកច្រើនត្រូវបានបង្កើតឡើយលើអចលនវត្ថុតែមួយ លំដាប់នៃហ៊ីប៉ូតែកត្រូវអនុលោមទៅតាមពេលវេលាដែលបានចុះបញ្ជី (មាត្រា៨៥១ នៃក្រមរដ្ឋប្បវេណី) ។

២៥- ដើម្បីឲ្យកិច្ចសន្យាមានសុពលភាព និងមិនអាចលុបចោលបាន ត្រូវមានលក្ខខណ្ឌ២គឺ ៖

• លក្ខខណ្ឌទាក់ទងទៅនឹងគូភាគី
• លក្ខខណ្ឌទូទៅទាក់ទងទៅនឹងខ្លឹមសារ ។

តភាគ