សំណួរ-ចម្លើយ ក្រមរដ្ឋប្បវេណី និងក្រមនីតិវិធីរដ្ឋប្បវេណី (ភាគ៣០)

សំណួរ

១៤៦- តើលំហូរនៃសន្តតិកម្មមានអ្វីខ្លះ ?

១៤៧- តើសន្តតិកម្មតាមច្បាប់គឺជាអ្វី ?

១៤៨- តើសហព័ទ្ធគឺសំដៅទៅលើអ្វី ?

១៤៩- តើញាតិលោហិតគឺសំដៅលើអ្វី ?

១៥០- តើញាតិពន្ធគឺសំដៅលើអ្វី ?

ចម្លើយ

១៤៦- លំហូរនៃសន្តតិកម្មមានដូចជា ៖

• ពិនិត្យមើលពីអត្ថិភាពនៃមតកសាសន៍
• (ប្រសិនបើគ្មាន) ការកំណត់ពីសន្តតិជន និងចំណែកមត៌ក (សន្តតិជនណាត្រូវទទួលបានចំណែកប៉ុន្មានភាគនៃមត៌ក)
• ការកំណត់ពីមត៌ក ការវាយតម្លៃ
• ការកែសម្រួលចំណែកមត៌ក (ផលប្រយោជន៍ពិសេស ភាគនៃវិភាគទាន)
• ការគណនាចំនួនៃចំណែកមត៌ក
• ការបែងចែកមត៌ក ។

១៤៧- សន្តតិកម្មតាមច្បាប់ គឺជាទម្រង់នៃសន្តតិកម្មដែលត្រូវអនុវត្តទៅតាមការកំណត់របស់បញ្ញត្តិនៃច្បាប់ពាក់ព័ន្ធនឹងសន្តតិជន នៅក្នុងករណីដែលមត៌កជនមិនបានធ្វើបណ្តាំមត៌ក (មត៌កសាសន៍) ហើយសហសន្តតិជនមិនអាចព្រមព្រៀងគ្នាតាមការពិភាក្សា ។ សន្តតិកម្មតាមច្បាប់ត្រូវបានតាក់តែងឡើង ដោយគតិទៅដល់យុត្តិធម៌រវាងញាតិដែលត្រូវបានកំណត់ថាជា “សន្តតិជន” ។

១៤៨- សហព័ទ្ធ គឺសំដៅទៅលើភាគីម្ខាងទៀតនៃអាពាហ៍ពិពាហ៍ មានន័យថាប្រសិនបើមើលពីខាងប្តី បុគ្គលនោះគឺជា “ប្រពន្ធ” ប្រសិនបើមើលពីខាងប្រពន្ធ បុគ្គលនោះគឺជា “ប្តី” ។

១៤៩- ញាតិលោហិត គឺសំដៅលើបុគ្គលដែលមានទំនាក់ទំនងខ្សែលោហិតពីកំណើតជាមួយបុគ្គលម្នាក់ (ញាតិលោហិតពិកំណើត) ។ ឧទាហរណ៍ ឪពុកម្តាយ កូន ជីដូនជីតា ចៅ បងប្អូនប្រុស ស្រី ឪពុកមា ម្តាយមីង ឬអ៊ំប្រុសអ៊ំស្រី ក្មួយប្រុសក្មួយស្រី ដែលជាជនជាប់ខ្សែលោហិតពីកំណើត ។

១៥០- ញាតិពន្ធ គឺសំដៅលើបុគ្គលដែលមានទំនាក់ទំនងតាមរយៈការរៀបអាពាហ៍ពិពាហ៍ ។ មានន័យថា ជាទំនាក់ទំនងរវាងខ្លួនជាមួយនឹងញាតិលោហិតរបស់សហព័ទ្ធរបស់ខ្លួន ឬទំនាក់ទំនងរវាងខ្លួនជាមួយនឹងសហព័ទ្ធរបស់ញាតិលោហិត ។

តភាគ