សំណួរ-ចម្លើយ ក្រមរដ្ឋប្បវេណី និងក្រមនីតិវិធីរដ្ឋប្បវេណី (ភាគ៤២)

សំណួរ

២០៦- តើកាតព្វកិច្ចដែលបានកំណត់ប្រភេទនៃវត្ថុត្រូវបានបែងចែកជាប៉ុន្មានកាតព្វកិច្ច ?

២០៧- តើវត្ថុដែលមិនកំណត់ជាក់លាក់នឹងត្រូវកំណត់យ៉ាងដូចម្តេច ?

២០៨- តើកាតព្វកិច្ចធ្វើសកម្មភាពគឺជាអ្វី ? ចូរឲ្យឧទាហរណ៍ ?

២០៩- តើកាតព្វកិច្ចមានគោលបំណងមិនឲ្យធ្វើសកម្មភាពគឺជាអ្វី ? ចូរឲ្យឧទាហរណ៍ ?

២១០- តើកាតព្វកិច្ចត្រូវបានរំលត់ដោយមូលហេតុអ្វីខ្លះ ?

ចម្លើយ

២០៦- កាតព្វកិច្ចដែលបានកំណត់ប្រភេទនៃវត្ថុត្រូវបានបែងចែកជាកាតព្វកិច្ចពីរប្រភេទគឺ ៖

• កាតព្វកិច្ចប្រគល់វត្ថុកំណត់មិនជាក់លាក់ (មាត្រា ៣១៥​ នៃក្រមរដ្ឋប្បវេណី)
• កាតព្វកិច្ចប្រគល់វត្ថុកំណត់ជាក់លាក់ ។ (មាត្រា ៣១៥​ នៃក្រមរដ្ឋប្បវេណី)

២០៧- វត្ថុដែលមិនកំណត់ជាក់លាក់នឹងត្រូវបានធ្វើការកំណត់ដូចជា ៖

• កូនបំណុលបានកំណត់វត្ថុដែលត្រូវផ្តល់ច្បាស់លាស់
• កូនបំណុលបានបញ្ចប់រាល់សកម្មភាពចាំបាច់ដើម្បីផ្តល់នូវវត្ថុដែលបានកំណត់នោះ ។

២០៨- កាតព្វកិច្ចធ្វើសកម្មភាព គឺជាកាតព្វកិច្ចមានបំណងឲ្យធ្វើសកម្មភាពជាក់លាក់ណាមួយ ។ ឧទាហរណ៍ កិច្ចសន្យាការងារ កិច្ចសន្យាអាណត្តិ កិច្ចសន្យាសាងសង់ ។

២០៩- កាតព្វកិច្ចមានគោលបំណងមិនឲ្យធ្វើសកម្មភាព គឺជាកាតព្វកិច្ចដែលមានកម្មវត្ថុមិនឲ្យធ្វើសកម្មភាពណាមួយ ។ ឧទាហរណ៍ ក្នុងកិច្ចសន្យាទិញលក់មូលនិធិពាណិជ្ជកម្ម អ្នកលក់ត្រូវបានហាមឃាត់មិនឲ្យបើកអាជីវកម្មដូចគ្នាក្នុងរយៈពេលកំណត់ណាមួយ ដើម្បីប្រកួតប្រជែងនឹងអាជីវកម្មដែលខ្លួនបានលក់ឲ្យអ្នកទិញ ។

២១០- កាតព្វកិច្ចត្រូបានរំលត់ដោយមូលហេតុដូចជា ៖

• ការរំលត់កាតព្វកិច្ចដោយសារសកម្មភាពភាគី
• អលទ្ធភាពក្នុងការអនុវត្តកាតព្វកិច្ចដោយគ្មានកំហុសរបស់កូនបំណុល (មាត្រា ៤៣៣ ចំណុច ខ ដល់មាត្រា ៤២៥ នៃក្រមរដ្ឋប្បវេណី)
• ការបំពេញលក្ខខណ្ឌបង្អង់ ឬការរំលាយកិច្ចសន្យា (មាត្រា ៤៣៣ នៃក្រមរដ្ឋប្បវេណី)
• ការផុតអាជ្ញាយុកាលនៃការរំលត់សិទ្ធិលើបំណុល (មាត្រា ៤៣៣ ចំណុច ឃ មាត្រា ៤៨០ ដល់ ៥០០​នៃក្រមរដ្ឋប្បវេណី)
• ការអនុវត្តសិទ្ធិលុបចោល ។

តភាគ