សំណួរ-ចម្លើយ ច្បាប់ស្តីពីមូលបត្ររដ្ឋ (ភាគ២)

សំណួរ

៧- តើប្រធានស្ថាប័នរដ្ឋបាលកណ្តាលសំដៅដល់អ្វី ?

៨- តើច្បាប់ធនាគារជាតិសំដៅដល់អ្វី ?

៩- តើការបោះផ្សាយ និងការដាក់លក់មូលបត្ររដ្ឋត្រូវអនុវត្តអ្វីខ្លះ ?

១០- ក្នុងករណីមានការប្រគល់សិទ្ធិ ដូចមានចែងក្នុងកថាខណ្ឌទី២នៃមាត្រានេះ ទេសាភិបាលធនាគារជាតិនៃកម្ពុជា ត្រូវផ្ញើរបាយការណ៍ប្រចាំឆ្នាំ ជូនទៅរដ្ឋមន្រ្តីអំពីការទូទាត់លើគណនីរបស់ ម.គ.ម.រ. នៅមុនដំណាច់ខែកុម្ភៈនៃឆ្នាំសាពើពន្ធបន្ទាប់ ។ តើរបាយការណ៍ប្រចាំឆ្នាំត្រូវមានចំណុចអ្វីខ្លះ ?

១១- តើប្រភពហិរញ្ញវត្ថុរបស់ ម.គ.ម.រ. អាចបានមកពីប្រភពចំណូលអ្វីខ្លះ ?

១២- តើមូលនិធិគ្រប់គ្រងមូលបត្ររដ្ឋ (ម.គ.ម.រ.) ត្រូវបានប្រើប្រាស់ដើម្បីបំពេញគោលដៅអ្វីខ្លះ ?

១៣- គណៈកម្មាធិការចម្រុះសម្រាប់ការអភិវឌ្ឍន៍ទីផ្សារមូលបត្ររដ្ឋ អាចត្រូវបានបង្កើតឡើងដោយរាជរដ្ឋាភិបាល តាមសំណើររបស់រដ្ឋមន្ត្រីពិភាក្សា និងសម្រេចលើគោលនយោបាយសំខាន់ៗដែលទាក់ទងនឹងការអភិវឌ្ឍន៍ទីផ្សារមូលបត្ររដ្ឋ ។ តើគណៈកម្មាធិការចម្រុះនេះត្រូវមានសមាសភាពអ្វីខ្លះ ?

ចម្លើយ

៧- ប្រធានស្ថាប័នរដ្ឋបាលកណ្តាល សំដៅដល់ថ្នាក់ដឹកនាំក្រសួងនានា និងថ្នាក់ដឹកនាំនៃស្ថាប័នរដ្ឋបាលកណ្តាលផ្សេងទៀត ដែលទទួលបានសិទ្ធិស្របច្បាប់ និងមានតួនាទីស្មើក្រសួងនានា ។

៨- ច្បាប់ធនាគារជាតិ សំដៅដល់ច្បាប់ពីការរៀបចំ និងការប្រព្រឹត្តទៅនៃធនាគារជាតិនៃកម្ពុជា ដែលប្រកាសឲ្យប្រើដោយព្រះរាជក្រមលេខ ន.ស/ រ.ក.ម/ ០១៩៦/២៧ ចុះថ្ងៃទី២៦ ខែមករា ឆ្នាំ១៩៩៦ ។

៩- ការបោះផ្សាយ និងការដាក់លក់មូលបត្ររដ្ឋត្រូវអនុវត្តដូចជា ៖

• មានតែរដ្ឋមន្ត្រីម្នាក់ប៉ុណោ្ណះ ដែលអាចបោះផ្សាយមូលបត្ររដ្ឋក្នុងក្របខណ្ឌចំណាយនៃ ម.គ.ម.រ. ដូចមានចែងក្នុងមាត្រា៧នៃច្បាប់នេះ ។ រដ្ឋមន្រ្តីអាចទិញ ទូទាត់សង និងផ្តល់ប្រាក់វិញនូវរាល់មូលបត្ររដ្ឋដែលដល់ ឬមិនទាន់ដល់ឥណប្រតិទាន ។ ប្រាក់ដើម និងការប្រាក់នៃមូលបត្ររដ្ឋត្រូវបានធានាដោយគ្មានលក្ខខណ្ឌពីរាជរដ្ឋាភិបាល ។
• រតនាគារជាតិ និងនាយកដ្ឋានពាក់ព័ន្ធ ដែលស្ថិតនៅក្រោមការដឹកនាំរបស់រដ្ឋមន្ត្រីត្រូវទទួលបន្ទុករាល់កិច្ចការពាក់ព័ន្ធនឹងមូលបត្ររដ្ឋ លើកលែងតែរដ្ឋមន្ត្រីបានផ្ទេរសិទ្ធិអំណាចជាលាយលក្ខណ៍អក្សរទៅឲ្យស្ថាប័នរដ្ឋដទៃទៀត ។
• ដូចមានចែងក្នុងមាត្រា២៣នៃច្បាប់ធនាគារជាតិ រាល់ការងារ​បច្ចេកទេសនិងប្រតិបត្តិការទាក់ទងនឹងមូលបត្ររដ្ឋ អាចអនុវត្តដោយធនាគារជាតិនៃកម្ពុជា ដោយមានការណែនាំពីរដ្ឋមន្ត្រី ដែលមានចែងនៅក្នុងអនុក្រឹត្យ លើកលែងតែមានចែងក្នុងច្បាប់ផ្សេងទៀត ។ ទេសាភិបាលធនាគារជាតិនៃកម្ពុជា ត្រូវបង្កើតនូវនីតិវិធីដើម្បីបែងចែកឲ្យដាច់ដោយឡែកពីគ្នានូវមុខងារប្រតិបត្តិការទាក់ទងនឹងមូលបត្ររដ្ឋ និងមុខងារគោលនយោបាយរូបិយវត្ថុ ។

១០- ក្នុងករណីមានការប្រគល់សិទ្ធិ ដូចមានចែងក្នុងកថាខណ្ឌទី២នៃមាត្រានេះ ទេសាភិបាលធនាគារជាតិនៃកម្ពុជា ត្រូវផ្ញើរបាយការណ៍ប្រចាំឆ្នាំ ជូនទៅរដ្ឋមន្រ្តីអំពីការទូទាត់លើគណនីរបស់ ម.គ.ម.រ. នៅមុនដំណាច់ខែកុម្ភៈនៃឆ្នាំសាពើពន្ធបន្ទាប់ ។ របាយការណ៍ប្រចាំឆ្នាំត្រូវមានចំណុចដូចជា​៖

• របាយការណ៍ស្តីពីស្ថានភាពទូទៅ និងការវិភាគលើ ម.គ.ម.រ.
• តារាងតុល្យការ
• របាយការណ៍ចំណូល-ចំណាយ
• របាយការណ៍លំហូរសាច់ប្រាក់ និងឯកសារដើមផ្សេងៗ
• ឯកសារពាក់ព័ន្ធផ្សេងៗដែលទាក់ទងនឹងការទូទាត់លើគណនីរបស់ ម.គ.ម.រ. ។

១១- ប្រភពហិរញ្ញវត្ថុរបស់ ម.គ.ម.រ. អាចបានមកពីប្រភពចំណូលដូចជា ៖

• ចំណូលបានមកពីការបោះផ្សាយមូលបត្ររដ្ឋ
• ចំណូលការប្រាក់ដែលបានពីគណនីប្រាក់បញ្ញើ និងមូលនិធិផ្សេងទៀត
• អតិបកនៃការទូទាត់ប្រចាំឆ្នាំ
• វិភាគទានពីរាជរដ្ឋាភិបាល
• ចំណូលបានពីប្រតិបត្តិការផ្សេងៗរបស់ ម.គ.ម.រ. ។

១២- មូលនិធិគ្រប់គ្រងមូលបត្ររដ្ឋ (ម.គ.ម.រ.) ត្រូវបានប្រើប្រាស់ដើម្បីបំពេញគោលដៅដូចជា ​៖

• ទូទាត់សងប្រាក់ដើម និងការប្រាក់នៃមូលបត្ររដ្ឋដែលមានបោះផ្សាយ
• ដាក់ទៅក្នុងគណនី និងក្នុងមូលនិធិផ្សេងៗនូវប្រាក់ចំណូលរបស់ ម.គ.ម.រ.
• ទូទាត់សងរាល់ចំណាយចាំបាច់នៃការគ្រប់គ្រង ម.គ.ម.រ.
• អាចទិញមូលបត្ររដ្ឋ​និងសញ្ញាបណ្ណមហាជនផ្សេងៗនិងដាក់ប្រាក់បញ្ញើរយៈពេលខ្លី ឬផ្តល់ឥណទាន រយៈពេលខ្លីទៅឲ្យគ្រឹះស្ថានហិរញ្ញវត្ថុនានា​ ។ រដ្ឋមន្ត្រីអាចចេញប្រកាសឲ្យប្រើប្រាស់សាច់ប្រាក់ ដែលនៅសល់ក្នុងគោលបំណងផ្សេងៗ ។

១៣- គណៈកម្មាធិការចម្រុះនេះត្រូវមានសមាសភាពដូចជា ៖

• រដ្ឋមន្រ្តី
• ទេសាភិបាលធនាគារជាតិនៃកម្ពុជា
• ប្រធានស្ថាប័នរដ្ឋបាលកណ្តាលផ្សេងទៀតដែលពាក់ព័ន្ធ ប្រសិនបើមាន
• ជំនាញការមកពីផ្នែកឯកជន ។

តភាគ