សំណួរ-ចម្លើយ ប្រកាសស្តីពីពន្ធលើប្រាក់ចំណូល (ភាគ៤)

សំណួរ

១៦- តើការវាយតម្លៃតាមបរិយាទានលទ្ធកម្ម (ថ្លៃដើមទំនិញដែលទទួលបាន) តាមថ្លៃទិញពិតដែលផ្សំឡើងដោយអ្វីខ្លះ ?

១៧- តើការវាយតម្លៃតាមបរិយាទានផលិតកម្ម (ថ្លៃដើមផលិតផល) ដែលត្រូវផ្សំឡើងដោយអ្វីខ្លះ ?

១៨- តើបរិយាទានមធ្យមភាគសមតាមានប៉ុន្មានរបៀប ?

១៩- តើការងារកំពុងដំណើរការត្រូវវាយតម្លៃតាមបរិយាទានផលិតកម្មដែលជាអាទិ៍ផ្សំឡើងដោយអ្វីខ្លះ ?

២០- តើការផ្គត់ផ្គង់ទំនិញអាចធ្វើឡើងក្រោមលក្ខខណ្ឌអ្វីខ្លះ ?

ចម្លើយ

១៦- ការវាយតម្លៃតាមបរិយាទានលទ្ធកម្ម (ថ្លៃដើមទំនិញដែលទទួលបាន) តាមថ្លៃទិញពិតដែលផ្សំឡើងដោយ ៖

• ថ្លៃទិញតាមវិក្កយបត្រ ។ ការចុះថ្លៃ ការបន្ថយថ្លៃ ឬការបង្វិលតម្លៃដែលពាក់ព័ន្ធនឹងការទិញ ដែលអ្នកផ្គត់ផ្គង់បានយល់ព្រមផ្តល់ឲ្យត្រូវាកាត់ចេញពីថ្លៃទិញ
• ចំណាយបន្ទាប់បន្សំពាក់ព័ន្ធផ្ទាល់នឹងការទិញឬការផ្គត់ផ្គង់ ដែលក្នុងនោះមានការដឹកជញ្ជូន សោហ៊ុយឆ្លងកាត់ ប្រាក់កម្រៃឬកម្រៃជើងសា ការលើកឬដាក់ទំនិញ ពន្ធគយនិងពន្ធអាករផ្សេងទៀត លើកលែងតែអាករលើតម្លៃបន្ថែមដែលអាចស្នើសុំជាឥណទានវិញបាន ។ ចំណាយទូទៅនៃការផ្គតផ្គត់ និងចំណាយក្នុងការស្តុក មិនត្រូវគិតបញ្ចូលក្នុងបរិយាទានលទ្ធកម្មទេ ។ ការខាតឬការខ្ជះខ្ជាយជាយថាហេតុ ព្រមទាំងចំណាយហិរញ្ញវត្ថុផងក៏មិនត្រូវគិតបញ្ចូលក្នុងបរិយាទាននេះដែរ ។

១៧- ការវាយតម្លៃតាមបរិយាទានផលិតកម្ម (ថ្លៃដើមផលិតផល) ដែលត្រូវផ្សំឡើងដោយ ៖

• បរិយាទានលទ្ធកម្មនៃវត្ថុធាតុដើម ឬសម្ភារផ្គត់ផ្គង់ ដែលបានប្រើប្រាស់សម្រាប់ផលិតកម្ម
• ចំណាយដោយផ្ទាល់ដើម្បីនាំផលិតផលទៅដល់ទីកន្លែង និងតាមលក្ខខណ្ឌដែលផលិតផលនោះស្ថិតនៅជាក់ស្តែង ។ សហគ្រាសអាចបូកបញ្ចូលនូវចំណាយមិនផ្ទាល់ក្នុងលក្ខខណ្ឌដែលចំណាយនោះអាចបញ្ចូលដោយសមហេតុផលទៅក្នុងបរិយាទានផលិតកម្មនៃស្តុក
• មិនត្រូវគិតបញ្ចូលក្នុងបរិយាទានផលិតកម្មទេនូវចំណាយរដ្ឋបាលទូទៅ ចំណាយស្តុកផលិតផល ចំណាយស្រាវជ្រាវនិងះអភិវឌ្ឍន៍ និងចំណាយហិរញ្ញវត្ថុ ។

១៨- បរិយាទានមធ្យមភាគសមតាមានប២របៀបគឺ ៖

• បរិយាទានមធ្យមភាគសមតាប្រចាំខែ
• បរិយាទានមធ្យមភាគសមតាក្រោយពេលបញ្ចូលម្តងៗ ។

១៩- ការងារកំពុងដំណើរការត្រូវវាយតម្លៃតាមបរិយាទានផលិតកម្មដែលជាអាទិ៍ផ្សំឡើងដោយ ៖

• បរិយាទាននៃសម្ភារៈដែលបានប្រើប្រាស់
• ចំណាយពលកម្ម
• ចំណាយនានានៅការដ្ឋាន
• មួយភាគនៃចំណាយទូទៅនៃស្នាក់ការកណ្តាល និងមួយភាគនៃរំលស់ដែលជាទូទៅច្រើនតែវាយតម្លៃតាមវិធីប៉ាន់ស្មាន ។

២០- ការផ្គត់ផ្គង់ទំនិញអាចធ្វើឡើងក្រោមលក្ខខណ្ឌដូចជា ៖

• ការផ្គត់ផ្គង់ក្រោមលក្ខខណ្ឌព្យួរកិច្ចសន្យា
• ការផ្គត់ផ្គង់ក្រោមលក្ខខណ្ឌរំលាយកិច្ចសន្យា
• ប្រាក់កាត់ទុកដើម្បីធានា
• ប្រាក់កក់ ។

តភាគ