តើឥរិយាបទមន្ត្រីរាជការត្រូវមានគុណសម្បត្តិអ្វីខ្លះ ?

ឥរិយាបទមន្ត្រីរាជការត្រូវមានគុណសម្បត្តិដូចជា ៖

ក- ឆន្ទៈម្ចាស់ ជាកត្តាកំណត់ពីភាពជោគជ័យរបស់បុគ្គល ឬក្រុម ឬអង្គភាព ។ ឆន្ទៈផ្តើមចេញពីមនសិការបស់បុគ្គល មិនមែនជាកត្តាកំណត់ ឬជាការចាប់បង្ខំទេ ។

កត្តាមួយចំនួនគួរប្រតិបត្តិរួមមាន ៖

• មានទឹកចិត្តស្រលាញ់ការងារ
• មានគំនិតផ្តួចផ្តើម និងច្នៃប្រឌិត
• ការបំពេញកាតព្វកិច្ចក្នុងស្មារតីជាក្រុម
• ស្មារតីឈ្មុសឈ្មុលនឹងការងារ
• ការជម្នះឧបសគ្គ

ខ- ភក្តីភាព ជាសេចក្តីត្រូវការរបស់មនុស្ស ក្នុងសង្គមអរិយធម៌ ដែលត្រូវប្រកាន់ភ្ជាប់ ដើម្បីលើកតំឡើងកិត្តិយស និងសេចក្តីថ្លៃថ្នូរទាំងក្នុងនាមបុគ្គល ទាំងក្នុងនាមស្ថាប័ន ។  ភក្តីភាពជាសុជីវធម៌ និងសីលធម៌ ដែលជាគុណតម្លៃខាងចរិយាធម៌របស់មនុស្ស ។

ភក្តីភាពទាំងនោះរួមមាន ៖

• ភក្តីភាពចំពោះស្ថាប័ន
• ភក្តីភាពចំពោះវិជ្ជាជីវៈ
• ភក្តីភាពចំពោះប្រជាពលរដ្ឋដែលជាអ្នកប្រើប្រាស់សេវា

គ- មនសិកាវិជ្ជាជីវៈ សកម្មភាពសំខាន់ៗដែលត្រូវប្រតិបត្តិរួមមាន ៖

• ប្រឹងប្រែងបំពេញការងារឲ្យអស់លទ្ធភាពជាមួយមធ្យោបាយដែលមាន សំដៅធ្វើឲ្យមានការរីកចម្រើន និងប្រសិទ្ធភាព
• យកចិត្តទុកដាក់បំពេញការងារ និងមានមនសិកាការងារ ដើម្បីសម្រេចបានលទ្ធផល ដែលបានគ្រោងទុក
• ប្តេជ្ញាចិត្តធ្វើការអភិវឌ្ឍខ្លួន និងប្រើប្រាស់សមត្ថភាព ចំណេះដឹង ជំនាញ ភាពប៉ិនប្រសប់ និងចរិតលក្ខណៈរបស់ខ្លួនឲ្យបានជាអតិបរមា និងសេចក្តីថ្លៃថ្នូរ
• ស្វិតស្វាញក្នុងធ្វើការងារជាមួយអ្នករាជការផ្សេងទៀត
• ហ៊ានលះបង់កំលាំងកាយចិត្ត ចំពោះការងារ និងផលប្រយោជន៍សាធារណៈ
• បង្កើនសមត្ថភាពជំនាញ ឯកទេស ចំណេះដឹង និងបទពិសោធន៍របស់ខ្លួន ដើម្បីអភិវឌ្ឍវិជ្ជាជីវៈរបស់ខ្លួនឲ្យទាន់សភាពការណ៍
• មិនត្រូវយកម៉ោងការងារទៅបំពេញមុខរបរបន្ថែម
• មិនអាចទទួលយកនូវផលប្រយោជន៍នានា​ ដែលនាំឲ្យប៉ះពាល់ដល់អាព្យាក្រឹត្យរបស់មន្រ្តីរាជការ
• រក្សាការសំងាត់វិជ្ជាជីវៈតាមគោលការណ៍ ដែលមានចែងក្នុងច្បាប់ជាធរមាន
• ត្រូវប្រកាន់ភ្ជាប់នូវកាតព្វកិច្ចលក្ខការណ៍ (មិននិយាយ មិនសរសេរពីអ្វីដែលនាំឲ្យប៉ះពាល់ដល់កិត្តិយស និងកិត្យានុភាពរបស់អង្គភាព)
• ត្រូវទទួលខុសត្រូវលើការប្រតិបត្តិរបស់ខ្លួន ចំពោះភារកិច្ច​ដែលបានប្រគល់ឲ្យ
• ត្រូវតែគោរពតាមការចាត់តាំងពីថ្នាក់លើរបស់ខ្លួន
• ត្រូវគោរពវិន័យការងារ ម៉ោងធ្វើការ និងបទបញ្ជាផ្ទៃក្នុង

ឃ- វប្បធម៌សេវាសាធារណៈ គោលការណ៍សំខាន់ៗរួមមាន ៖

• ការផ្លាស់ប្តូរឥរិយាបទ ៖ ឥរិយាបទ និងរបៀបទំនាក់ទំនងការងារ ពីអ្នកគ្រប់គ្រងឲ្យទៅជាអ្នកផ្តល់សេវាដ៏មានប្រសិទ្ធភាព
• អ្នកផ្តល់សេវា ៖

- សេចក្តីត្រូវការរស់ប្រជាពលរដ្ឋ គឺជាអាទិភាពនិងជាកាតព្វកិច្ចរបស់អ្នកផ្តល់សេវា (មន្រ្តី) ដែលត្រូវឆ្លើយតបប្រកបដោយមនសិកាវិជ្ជាជីវៈ និងសេចក្តីថ្លៃថ្នូរ

- ត្រូវធ្វើឲ្យអ្នកទទួលសេវា (ប្រជាពលរដ្ឋ) មានភាពកក់ក្តៅ រាក់ទាក់ ការគោរព ភាពពេញចិត្ត និងជឿទុកចិត្ត

• អ្នកប្រើប្រាស់យោបល់ ៖

-​ ផ្តល់ព័ត៌មាន និងពន្យល់អំពីនីតិវិធី បែបបទនៃការផ្តល់សេវា

- សំណួររបស់ប្រជាពលរដ្ឋ ត្រូវតែមានចម្លើយ និងមិនត្រូវបង្ហាញនូវអាកប្បកិរិយាធុញទ្រាន់ ក្រអឺតក្រទមរើសអើង ។

• ការសម្របសម្រួល ៖

- កាត់បន្ថយនូវគម្លាតរវាងអ្នកផ្តល់សេវា និងអ្នកទទួលសេវា ការយល់ច្រឡំ និងការខ្វែងគំនិតគ្នា

- នីតិវិធីនៃការផ្តល់សេវាមានភាពសាមញ្ញ ខ្លី និងទាន់ពេលវេលា និងមានភាពរលូនក្នុងការងារ

- អតិថិជន គឺជាស្ដេចនិងការពេញចិត្តរបស់អ្នកប្រើប្រាស់សេវា គឺជាកាតព្វកិច្ចរបស់អ្នកផ្តល់សេវា ។