សំណួរ-ចម្លើយ ការគ្រប់គ្រងបុគ្គលិកប្រកបដោយភាពវ័យឆ្លាត (ភាគ៥)

សំណួរ

២១- តើវិធីសាស្ត្រនៃការប្រកាសជ្រើសរើសបុគ្គលិកគឺជាអ្វី ?

២២- តើប្រភពនៃការស្វែងរកបេក្ខជនអាចត្រូវបានជ្រើសរើសចេញពីមជ្ឈដ្ឋានអ្វីខ្លះ ?

២៣- តើការប្រកាសជ្រើសរើសខាងក្នុងគឺសំដៅដល់អ្វី ?

២៤- តើការជ្រើសរើសបុគ្គលិកមកពីខាងក្រៅគឺសំដៅដល់អ្វី ?

២៥- តើការបណ្តុះបណ្តាលនៅក្រៅកន្លែងធ្វើការរួមមានអ្វីខ្លះ ?

ចម្លើយ

២១- វិធីសាស្ត្រនៃការប្រកាសជ្រើសរើសបុគ្គលិក គឺជាការផ្តោតការយកចិត្តទុកដាក់ជាសំខាន់ទៅនឹងកន្លែងដែលអាចប្រកាសជ្រើសរើស ហើយអាចទាក់ទាញបេក្ខជនឲ្យមកបំពេញការងារបាន ជាពិសេសទៅលើបុគ្គលិកទាំងឡាយណាដែលមានជំនាញនៅក្នុងបណ្តាទីផ្សារប្រកួតប្រជែង ដូចជា ធ្វើការប្រកាសនៅតាមការិយាល័យការងារ សាធាណៈ ឬភ្នាក់ងារឯកជន សាលារៀន មហាវិទ្យាល័យ ការផ្សព្វផ្សាយការងារពាណិជ្ជកម្មជាដើម ។ ម្យ៉ាងវិញទៀតការផ្សព្វផ្សាយដែលមានសក្តានុពល គឺជាផ្សព្វផ្សាយដែលបានជ្រួតជ្រាបដល់គ្រប់ស្រទាប់មហាជន និងជាពិសេសគឺបេក្ខជនដែលមានបំណងចង់ដាក់ពាក្យបំពេញការងារនោះ ។

២២- ប្រភពនៃការស្វែងរកបេក្ខជនអាចត្រូវបានជ្រើសរើសចេញពីមជ្ឈដ្ឋាន២មានដូចជា ៖

• មជ្ឈដ្ឋានខាងក្នុង
• មជ្ឈដ្ឋានខាងក្រៅអង្គភាព ។

២៣- ការប្រកាសជ្រើសរើសខាងក្នុង គឺសំដៅដល់ការប្រកាសជ្រើសរើសបុគ្គលិកដែលកំពុងបម្រើការងារខាងក្នុងក្រុមហ៊ុនផ្ទាល់តែម្តង ។ ហើយចំពោះគុណសម្បត្តិនៃការជ្រើសរើសបុគ្គលិកខាងក្នុងក្រុមហ៊ុន គឺថានិយោជកបានស្គាល់បុគ្គលិកនោះរួចហើយ ហើយវាក៏ជាសញ្ញាមួយនៃការលើកទឹកចិត្តដល់បុគ្គលិកដោយការតំឡើងឋានៈ ឬការផ្លាយស់ប្តូរមុខតំណែង ។

២៤- ការជ្រើសរើសបុគ្គលិកមកពីខាងក្រៅ គឺសំដៅដល់បេក្ខជន បេក្ខនារីដែលមិនធ្លាប់បានបម្រើការងារនៅក្នុងក្រុមហ៊ុនដែលធ្វើការជ្រើសរើសនេះពីមុនមក ហើយការជ្រើសរើសបុគ្គលិកពីខាងក្រៅត្រូវបានធ្វើឡើងតាមយៈ ៖

• ការផ្សព្វផ្សាយពាណិជ្ជកម្មការងារ
• ភ្នាក់ងាររកការងារឲ្យធ្វើ
• ការស្វែងរកតាមគ្រឹះស្ថានអប់រំនានា
• ការប្រើប្រាស់ពាក្យសុំធ្វើការងារដោយផ្ទាល់របស់បេក្ខជន
• ការចុះធ្វើកម្មសិក្សា
• និយោជិកផ្ទាល់របស់ក្រុមហ៊ុនឧទេ្ទសនាម ។

២៥- ការបណ្តុះបណ្តាលនៅក្រៅកន្លែងធ្វើការរួមមាន ៖

• ការបណ្តុះបណ្តាលតាមរបៀបសិក្ខាសាលា សន្និសិទ ឬការពិភាក្សាគ្នា ៖ ការសិក្សាបែបនេះ គឺសិក្សាបានបុគ្គលិកច្រើនគ្នា មានគោលដៅច្បាស់លាស់ និងរួមគ្នាពិភាក្សាពិគ្រោះយោបល់ ហើយតែងតែទទួលបានលទ្ធផលល្អប្រសើរលើការងារទៅថ្ងៃអនាគត ។ ប៉ុន្តែទោះបីជាយ៉ាងណាក៏ដោយ ការបណ្តុះបណ្តាលបែបនេះ ច្រើនអនុវត្តចំពោះក្រុមហ៊ុនធំៗ ដែលមានរចនាសម្ព័ន្ធធំទូលាយ ។
• ការបណ្តុះបណ្តាលតាមបែបថ្នាក់រៀន ៖ ជាការបណ្តុះបណ្តាលដែលមានលក្ខណៈប្រហាក់ប្រហែលនិងការបណ្តុះបណ្តាលខាងលើដែរ ដោយបុគ្គលិកចូលរួមអាចមានចំនួនច្រើន ហើយអ្នកបណ្តុះបណ្តាលមានចំនួនតិច ។
• ការបណ្តុះបណ្តាលតាមបែបធ្វើត្រាប់តាម ៖ គឺជាការសម្តែងតួក្នុងតួនាទីអ្វីមួយ និងក្នុងស្ថានភាពនៃការងារជាក់លាក់ណាមួយ ដោយផ្តោតជាពិសេសទៅលើភាពរហ័សរហួនលើអាកប្បកិរិយានិងសេវាកម្មល្អ ។

តភាគ