សំណួរ-ចម្លើយ ការគ្រប់គ្រងបុគ្គលិកប្រកបដោយភាពវ័យឆ្លាត (ភាគ៨)

សំណួរ

៣៦- មុនពេលចាប់ផ្តើមដំណើរការនៃការបណ្តុះបណ្តាល តើត្រូវធ្វើការវិភាគលើដំណាក់កាលអ្វីខ្លះ ?

៣៧- តើការវិភាគលើក្រុមហ៊ុន ឬអង្គភាពគឺជាអ្វី ?

៣៨- តើគោលការណ៍នៃការបណ្តុះបណ្តាលមានអ្វីខ្លះ ?

៣៩- តើវិធីសាស្រ្តនៃការបណ្តុះបណ្តាលមានអ្វីខ្លះ ?

៤០- តើការបណ្តុះបណ្តាលនៅកន្លែងធ្វើការគឺជាអ្វី ?

៤១- តើការ​បណ្តុះបណ្តាលនៅកន្លែងធ្វើការមានគុណសម្បត្តិអ្វីខ្លះ ?

៤២- តើការ​បណ្តុះបណ្តាលនៅកន្លែងធ្វើការមានគុណវិបត្តិអ្វីខ្លះ ?

ចម្លើយ

៣៦- មុនពេលចាប់ផ្តើមដំណើរការនៃការបណ្តុះបណ្តាល ត្រូវធ្វើការវិភាគលើដំណាក់កាល៣គឺ ៖

• ការវិភាគលើក្រុមហ៊ុន ឬអង្គភាព
• ការវិភាគលើការងារ
• ការវិភាគលើបុគ្គលិក ។

៣៧- ការវិភាគលើក្រុមហ៊ុន ឬអង្គភាព គឺជាការពិនិត្យមើលលើគោលដៅ ធនធាន និងបរិយាកាសការងាររបស់ក្រុមហ៊ុន ដើម្បីកំណត់ថាតើផ្នែកណាមួយដែលគួរតែផ្តល់ការបណ្តុះបណ្តាលដល់បុគ្គលិក ។ ប្រភពដែលអាចឆ្លើយតបនិងគោលដៅនេះដូចជាតម្រូវការហិរញ្ញាវត្ថុ ហើយធនធានមនុស្សក៏ត្រូវបានធ្វើការពិចារណាផងដែរ ។ គោលនយោបាយ និងបរិយាកាសនៃការគ្រប់គ្រងធនធានមនុស្ស វាមានឥទ្ធិពលទៅលើគោលដៅនៃការបណ្តុះបណ្តាលបុគ្គលិក ។

៣៨- គោលការណ៍នៃការបណ្តុះបណ្តាលមានដូចជា ៖

• ការលើកទឹកចិត្ត
• ការទទួលផលត្រឡប់វិញ
• ពង្រឹងការអនុវត្តការងារ
• ការផ្ទេរការបណ្តុះបណ្តាល
• ការអនុវត្តសារឡើងវិញ និងការពិនិត្យមើលបរិយាកាសជុំវិញ ។

៣៩- វិធីសាស្រ្តនៃការបណ្តុះបណ្តាលមានដូចជា ៖

• ការបណ្តុះបណ្តាលនៅកន្លែងធ្វើការ
• ការបណ្តុះបណ្តាលនៅក្រៅកន្លែងធ្វើការ ។

៤០- ការបណ្តុះបណ្តាលនៅកន្លែងធ្វើការ គឺជាការបណ្តុះបណ្តាលចំណេះដឹង ជំនាញ សមត្ថភាពបុគ្គលិកនៅក្នុងអង្គភាពតែម្តងពីអ្នកដែលមានបទពិសោធន៍លើការងារផ្ទាល់ ឬក៏ជួលអ្នកដែលមានចំណេញដឹងពីខាងក្រៅមកបង្រៀនផ្ទាល់នៅនឹងកន្លែងការងារ ដើម្បីឲ្យបុគ្គលិកឆាប់ចាប់បាន និងអនុវត្តការងារទាន់ពេលវេលា ។

៤១- ការ​បណ្តុះបណ្តាលនៅកន្លែងធ្វើការមានគុណសម្បត្តិដូចជា ៖

• ចំណាយតិច ហើយមានប្រសិទ្ធភាពក្នុងការអនុវត្តការងារ
• ផ្តល់ការលើកទឹកចិត្តខ្ពស់
• បង្កើតនូវសេចក្តីស្មោះត្រង់ និងមានការទទួលខុសត្រូវលើការងារ
• ឆាប់យល់ដឹងពីចំណុចគន្លឹះនៃភាពលំបាករបស់ការងារដែលខ្លួនមិនយល់នាពេលកន្លងមក

• ឆាប់ទទួលបានលទ្ធផលការងារ ។

៤២- ការ​បណ្តុះបណ្តាលនៅកន្លែងធ្វើការមានគុណវិបត្តិដូចជា ៖

• គឺអាស្រ័យលើឆន្ទៈអ្នកដែលចង់បង្រៀន
• មានភាពស្មុគស្មាញច្រើននៅពេលដែលមានការងារត្រូវធើ្វបន្ទាន់
• កង្វះខាតនូវបរិក្ខាសម្រាប់ធ្វើការបណ្តុះបណ្តាល
• ជំនាញនៅក្នុងការបណ្តុះបណ្តាលនៅមានកម្រិត
• ចេះចាំតែលើចំណុចណាដែលគេបង្រៀនលើការងារប៉ុណោ្ណះ ។

តភាគ