នៅពេលមានពិធីតំកល់សព ហែសព បូជាសពគេបានប្រគំបទភ្លេងក្លងខែកកំដរ ។ អ្នកខ្លះបដិសេធឈ្មោះនេះទៅវិញ ។ តើឈ្មោះត្រឹមត្រូវហៅអ្វី ? មានប្រវត្តិដូចម្តេច ?

នៅក្នុងពេលធ្វើពិធីហែសព តំកល់សព និងបូជាសពភ្ញៀវដែលចូលរួមពិធីត្រូវបង្ហាញទឹកមុខយ៉ាងណាដើម្បីរួមចំណែករំលែកទុក្ខដល់គ្រួសារនៃសព ។ ចំណែកបទភ្លេងទៀតសោតដែលគេប្រគំក្នុងពិធីមានសំនៀងកាន់តែធ្វើអោយបរិយាកាសស្រងះស្រងោចលន្លង់លន្លោចថែមទៀត ។ បទភ្លេងនោះខ្មែរយើងភាគច្រើននិយមហៅថាភ្លេងក្លងខែក តាមពិតពាក្យនេះជាឈ្មោះរបស់សៀមទេដល់អានន័យថាភ្លេងស្គរជ្វា ។ ចំណែកបទភ្លេងត្រឹមត្រូវខ្មែរយើងហៅថា “ភ្លេងឆ្លងឆ្លាក់” ។ តាមសេចក្តីរាយការណ៍របស់លោក ឌួង អ៊ួចថាកាលពីយូរណាស់មកហើយនៅវត្តពោធិរាមា ស្រុកកោះធំ ខេត្តកណ្តាល ព្រះគ្រូសិរីវង្សាជាមេតណៈក្នុងស្រុកនេះថាមានភ្លេងខ្មែរមួយវង់សំរាប់លេងទទួលកឋិន និងកំដរបុណ្យទានដែលលោកតែងហៅថាភ្លេងខែក​ លោកគ្រូអង្គនោះតែងមានពុទ្ធដីកាប្រាប់អ្នកសិ្នទ្ធស្នាលនឹងលោកថានេះហើយជាភ្លេងខ្មែរបុរាណជាយូរយារណាស់មកហើយ ។