សំណួរ-ចម្លើយ ក្រមរដ្ឋប្បវេណី និងក្រមនីតិវិធីរដ្ឋប្បវេណី (ភាគ៣១)

សំណួរ

១៥១- តើញាតិខ្សែផ្ទាល់គឺជាអ្វី ?

១៥២- តើសាខាញាតិសំដៅលើអ្វី ? ចូរឲ្យឧទាហរណ៍ ?

១៥៣- ដូចម្តេចដែលហៅថាបុព្វញាតិ ? ចូរឲ្យឧទាហរណ៍ ?

១៥៤- ដូចម្តេចដែលហៅថាបច្ឆាញាតិ ?

១៥៥- តើអ្វីទៅហៅថាថ្នាក់ញាតិ ?

ចម្លើយ

១៥១- ញាតិខ្សែផ្ទាល់ គឺជាទំនាក់ទំនងខ្សែលោហិតដែលត្រង់ផ្ទាល់ពីបុគ្គលម្នាក់ (ខ្លួនយើង) ចុះក្រោម និងពីបុគ្គលម្នាក់ (ខ្លួនយើង) ឡើងលើ ។

១៥២- សាខាញាតិ សំដៅលើទំនាក់ទំនងញាតិដែលបែកចេញជាមែកសាខាពីបុព្វញាតិតែមួយ ។ ឧទាហរណ៍ ទំនាក់ទំនងរវាងខ្លួននឹងបងប្អូនប្រុសស្រី ឪពុកមា ម្តាយមីង អ៊ំប្រុសអ៊ំស្រី ក្មួយប្រុស ក្មួយស្រី​ ដែលមានបុព្វបុរសរួមដូចគ្នា ។

១៥៣- ដែលហៅថាបុព្វញាតិ គឺជាញាតិលោហិតក្នុងជំនាន់មុន ដោយរាប់បញ្ជូលទាំងជំនាន់ដូចគ្នានឹងជំនាន់ឪពុកម្តាយខ្លួន ។ ឧទាហរណ៍ ទំនាក់ទំនងរវាងខ្លួនយើង និងឪពុកម្តាយ ជីដូនជីតា ឪពុកមា ម្តាយមីង ឬអ៊ំប្រុសអ៊ំស្រី ដែលជាជនស្ថិតនៅលំដាប់នៅពីលើខ្លួនយើង ។

១៥៤- ដែលហៅថាបច្ឆាញាតិ គឺសំដៅលើញាតិលោហិតជំនាន់ក្រោយ ដូចជាកូនរបស់ខ្លួន និងបុគ្គលជំនាន់ក្រោយដោយរាប់បញ្ជូលទាំងជំនាន់ដូចគ្នានឹងកូនៗទាំងនោះ ។

១៥៥- ថ្នាក់ញាតិ គឺជាឯកតាបង្ហាញពីរូបភាពនៃទំនាក់ទំនងញាតិ ។ ថ្នាក់ញាតិ ត្រូវកំណត់ដោយគណនាចំនួននៃតំណពូជ (ចំនួននៃទំនាក់ទំនងរវាងឪពុកម្តាយ និងកូន) រវាងញាតិ (ក្រមរដ្ឋប្បវេណី មាត្រា៩៣៩)​។

តភាគ