សំណួរ-ចម្លើយ កិច្ចការពារអ្នកប្រើប្រាស់ (ភាគ៣)

សំណួរ

១១- តើការផ្សព្វផ្សាយព័ត៌មានសំដៅដល់អ្វី ?

១២- តើសេវាសំដៅដល់អ្វី ?

១៣- តើផ្គត់ផ្គង់សំដៅដល់អ្វី ?

១៤- តើការផ្គត់ផ្គង់ច្រើនលើកសំដៅដល់អ្វី ?

១៥- តើសេចក្តីបរិយាយពាណិជ្ជកម្មសំដៅដល់អ្វី ?

ចម្លើយ

១១- ការផ្សព្វផ្សាយព័ត៌មាន សំដៅដល់ការធ្វើឲ្យដឹងសាធារណជនទូទៅ រួមបញ្ចូលទាំងការផ្សព្វផ្សាយតាមរយៈគេហទំព័ររបស់បញ្ញត្តិករពាក់ព័ន្ធឬតាមមធ្យោបាយផ្សេងៗទៀតដែលសាធារណជនមានលទ្ធភាពអាចរកព័ត៌មានបានដោយសេរីនិងដោយគ្មានការរារាំង ។

១២- សេវាសំដៅដល់រាល់សិទ្ធិ អត្ថប្រយោជន៍ អាទិភាព​ឬរាល់ការសម្រួលទាំងឡាយដែលត្រូវបានផ្តល់ ឬបានឲ្យតាមប្រភេទនៃកិច្ចសន្យា មានជាអាទិ៍ដូចខាងក្រោម លើកលែងសេវាហិរញ្ញវត្ថុមិនមែនធនាគារ ៖

ក- កិច្ចសន្យាទាក់ទងដល់ ៖

• ការបំពេញការងារទោះជាមានឬគ្មានការផ្គត់ផ្គង់ទំនិញក៏ដោយ ឬ
• ការផ្តល់ភាពងាយស្រួលឬការពេញចិត្តលើភាពងាយស្រួលរួមមាន ការស្នាក់នៅ ការលំហែ ការថែទាំមនុស្ស សត្វ ឬវត្ថុផ្សេងៗ ការកម្សាន្ត (លើកលែងល្បែងពាណិជ្ជកម្ម) ចំណត ឬ
• ការផ្តល់សិទ្ធិ អត្ថប្រយោជន៍ ឬផ្តល់អាទិភាព ដើម្បីទទួលបានប្រាក់កម្រៃ ។

ខ- កិច្ចសន្យារវាងអ្នកផ្តល់សេវាហិរញ្ញវត្ថុជាមួយនឹងអតិថិជនរបស់ខ្លួន ។

១៣- ផ្គត់ផ្គង់សំដៅដល់ ៖

• ការផ្គត់ផ្គង់ទំនិញតាមរយៈការផ្តល់ជាអំណោយ ការលក់ ការដោះដូរ ការជួល ឬការទិញដោយបង់រំលស់ជាដើម និង

• ការផ្តល់សេវា ។

១៤- ការផ្គត់ផ្គង់ច្រើនលើក សំដៅដល់ ៖

• ការផ្គត់ផ្គង់ច្រើនលើកដែលមានលក្ខណៈជាអចិន្រ្តៃយ៍នូវទំនិញតាមរយៈការផ្តល់ជាអំណោយ ការលក់ ការដោះដូរ ការជួល ឬការទិញដោយបង់រំលស់ និង
• ការផ្តល់សេវាច្រើនលើក ។

១៥- សេចក្តីបរិយាយពាណិជ្ជកម្ម សំដៅដល់ការបង្ហាញឬការបរិយាយអំពីទំនិញ រួមមានបរិមាណឬទំហំ របៀបបង្កើតឬផលិត សារធាតុដែលប្រើប្រាស់សម្រាប់ផលិត ពេលវេលាផលិត ភាពសមតាមបំណង ភាពមាំ មុខងារ លក្ខណៈឬភាពត្រឹមត្រូវ និងចរិតលក្ខណៈនៃរូបរាងដែលជាប់នឹងទំនិញ ។ សេចក្តីបរិយាយពាណីជ្ជកម្មមិនរាប់បញ្ចូលម៉ាកឬពាណិជ្ជនាមឡើយ ។

តភាគ